‘Nacente‘ é o nome da nova asociación cultural creada en Becerreá. A asociación está formada por rapaces de entre 18 e 21 anos da comarca dos Ancares. Con esta asociación, os mozos pretenden crear un espazo no que debatir, organizar novas actividades e fomentar a cultura nas zonas rurais como Becerreá.
Esta asociación cultural, formada por 26 mozos e mozas, foi creada oficialmente en abril, aínda que os rapaces levan un ano reuníndose e organizando diversos proxectos. ‘Nacente‘ pretende cambiar os costumes dos rapaces para divertirse e recuperar a complicidade que había antes nas aldeas.
Andrea Valle Alonso, a presidenta da asociación, anima á mocidade a levar a cabo actividades deste tipo e considera que as asociacións son unha boa alternativa para fomentar o uso da lingua galega. «Nacente é unha palabra ben nosa que transmite á perfección os obxectivos da asociación:ser un novo día, unha nova alternativa», alegou Andrea.
Estes rapaces da montaña luguesa pretenden crear un «recuncho» onde poder falar e debatir sobre literatura ou cine, por este motivo intentarán crear un pequeno xornal que reflexe a situación que se vive na súa zona. «Queremos darlle voz aos veciños», declarou a presidenta. ‘Nacente’ tamén organiza excursións para coñecer máis en profundidade a súa contorna, unhas viaxes que ata o momento foron subvencionadas por eles mesmos.
A ‘PIPA‘ foi a primeira asociación cultural que naceu en Becerreá coa edición dunha revista en 1988. Afonso Becerra Arrojo, o seu fundador, é un importante dramaturgo e director de escena actualmente en Galicia que comezou creando unha asociación na súa vila natal, Becerreá.» As mozas e os mozos debedes conquistar o territorio e facelo voso. Non hai dereito a que teñades que marchar da vosa vila ou do lugar no que crecestes só porque non vos ofrece os medios para desenvolvervos como persoas adultas independentes «, alegou Afonso.
Na actualidade, a ‘PIPA’ ofrece actividades culturais abertas ao público como o Certame Literario da Alta Montaña Luguesa, enfocado cara á xente moza que lle gusta escribir ou as Noites Poéticas, inauguradas en 1996 con Uxío Novoneyra. «O asociacionismo é un movemento, ou debería de selo, para avanzar e mellorar xuntas/os», así declarou o fundador da ‘PIPA’.
A ‘PIPA‘ foi o punto de partida para fomentar as actividades de tipo cultural en Becerreá. Na actualidade, existen diferentes asociacións na vila como Son de Cores, Zoela, As Candelas e, agora, Nacente. Todas elas enfocadas a diferentes actividades culturais que pretenden fomentar e recuperar os costumes tradicionais nunha zona de montaña como é Becerreá.